Cabanlas kampyon sa 70-above category 5K run

SUBLING gipamatud-an ni Konsehal Edgar Cabanlas nga dili babag ang edad sa pag-atiman sa pisikal nga kalig-on human kini malamposong mikompleto isip finisher sa 5-kilometer (5K) run ug nanguna sa iyang age category sa bag-ohay lang natapos nga Higalaay Half Marathon 2026 niadtong Domingo, Agosto 16, ning tuig diha sa Centrio Ayala Mall.

Ang marathon kabahin sa tinuig nga Higalaay Festival sa dakbayan nga nagdala sa tema: Cagayan de Oro: Atong gasa, atong garbo, atong giya.

Sa iyang mensahe isip chairman sa maong event, gipahayag ni Cabanlas nga gikinahanglan gayod kaniya ang personal nga mosalmot aron ipakita ang iyang ehemplo ug suporta sa administrasyon ni Mayor Rolando "Klarex" Uy diha sa pagpalambo sa maayong panglawas ug turismo sa dakbayan.

Pangandoy usab sa lokal nga kagamhanan nga sa umaabot nga mga katuigan, ang Higalaay Marathon mamahimo na nga usa ka dako ug inilang "international running event" nga makatupong o makatumbas  sa kaprestihiyoso sa mga sikat nga lumba sa nasod, sama sa Cebu International Marathon.

Alayon niini, dako ang pasalamat sa konsehal ngadto sa tanang partisipante, sa mga sponsor, security forces ug sa nag-organisar, ilabina sa Circle Productions Inc. sa hapsay ug luwas nga pagdumala sa tibuok lumba sa dagan.

“Congrats sa tanang runners. Kitang tanan mga mananaog!” panapos nga pamahayag ni Cabanlas. (RNQ/SP/Photo grabbed from Councilor Cabanlas FB page)