Recent Posts

Archive

Tags

No tags yet.

Cabanlas gi-aksyonan ang hangyo sa New Filchi association

Hayan makutayan na sa ilang linya sa kuryente ug tubig ang mga residente sa New Filchi Village Homeowners Association sa Calaanan, Barangay Canitoan.

Kini human gipasalig ni Floresca Sabuga-a, division head sa City Housing and Urban Development Department (CHUDD), nga ila nang makumpleto sa paghatag ang entry pass nga isa sa rekisitos sa Cagayan de Oro Water District (COWD) ug CEPALCO aron kini mataoran sa tubig ug kuryente ang mga benepisaryo sa Piso-Piso program sa goberno.

Nasayran, atol sa tigom sa komite sa urban and rural poor and housing development ni Konsehal Edgar Cabanlas, nga aduna pay 110 ka mga molupyo sa dapit ang wala pa makutayan sa kuryente ug tubig hinungdan nga gi-aghat ni Cabanlas ang mga kadagkuan sa CHUDD nga mapadali ang pag-isyu sa entry pass kay kinahanlanon kaayo kini ilabi na niining nag-atubang pa kita sa krisis tungod sa Covid-19.

Hinoon, gikalipay ni Cabanlas human mipasalig si Sabuga-a sa CHUDD nga ila nang makumpleto ang entry pass karong bulana ug pinakadugay sunod bulan.

Nunot niini, dili matukib ang kalipay ug pagpasalamat ni Gretchen Cual, president sa maong kapunungan tungod kay sa dili madugay makabaton na sila sa linya sa tubig ug kuryente nga sa dugayng panahon nila gihambin.