Balor P194M igahin pagsemento sa mga dalan sa 9 brgy

GILANTAWNG mahatagan sa dugang kaarangan ang kinabuhi sa mga molopyo sa siyam ka mga barangay sa syudad sa umaabot nga tuig 2022.

Kini human nasukip sa gisumeteng 2022 Executive Annual Budget ni Mayor Oscar Moreno ngadto sa konseho sa syudad ubos ni Bise Mayor Kikang Uy ang pagpatuman sa 17 ka mga proyekto pagsemento sa kadalanan nga mobalor og kapin sa P194 milyones.

Lakip sa gisugyot nga mapatuman mao ang proyekto pagsemento sa tulo ka dalan sa barangay Bayanga nga naglangkob sa Impaumbo road paingon sa sitio Hawaii, Mahayahay-Hawaii-Kiamis ug Midkiwan-Tagpangi road; pagsemento ug pagtukod og drainage sa CDORSHIP 4 sa barangay Balubal; pagsemento sa mga sa Villa Angela Subd. ug Villa Nena Subd. Sa barangay Balulang; pagsemento sa dalan lakip na ang pagtukod og drainage sa Villa Trinitas Subd., barangay Bugo; pagsemento sa Macopa Dansolihon paingon sa Tinipigan Road ug Langag-Lagandang-Magawa Road sa barangay Dansolihon; pagsemento sa Lumbia Dolawon Road (Phase 3), Patpat Lumbia paingon sa Bayanga ug Lumbia-Kiamis Road sa barangay Lumbia; pagsemento sa mga dalan sa Melecia Homes Subd. Sa Macasandig; pagsemento ug pagbutang og drainage sa dalan paingon sa CDO ERID facility sa barangay San Simon; pagsemento sa Tagpangi-Midkiwan-Bayanga Road sa barangay Tagpangi; ug pagsemento sa dalan sa sitio Tanguile paingon sa Magayad ug sitio Bankers paingon sa Dungoan Road sa barangay Tignapoloan.

Ang maong mga proyekto kabahin sa mga proyekto sa imprastraktura nga pundohan ubos sa 20% Development Fund (DF) sa tuig 2022.

Ang konseho sa syudad gipaabot nga motuki sa gisumeteng P7.25 bilyones nga 2022 executive budget sa umaabot nga mga adlaw.