Aplikasyon sa Agua de Oro Resources, Inc giuyonan sa konseho

GILANTAW  nga matubag ang dugay na nga mga hagit ug kakulangan sa suplay sa tubig sa syudad.

Kini human ang konseho sa sesyon niadtong Lunes nga gidumala ni Bise Mayor Bebot Rodriguez mipalabang sa resolusyon nga nagpadayag sa  walay pagsupak sa aplikasyon sa Agua de Oro Resources, Inc., alang sa pag-finance, pagpalambo, pagtukod, pag-operate ug pagmintinar sa Level III Water Supply, Distribution, Connection, Metering and System Modernization Program dinhi sa dakbayan sa Cagayan de Oro.

Si Konsehal Eric Salcedo, chairman sa komite sa public utilities, mipasabot may susama nang mga resolusyon nga gisagop sa konseho nga nagpadayag sa walay pagsupak, sama sa Balibago, JE Hydro Water ug Mindanao Water Cooperative.

Matod sa konsehal nga iyang giduso ang maong lakang tungod kay ang dakbayan adunay dakong kakulangon ug nanginahanglan sa igong supply sa tubig.

Sa miaging tigom sa iyang komite, ang representante sa Agua de Oro Resources mibutyag nga ang kasadpan nga bahin sa siyudad ang ilang tagaan og serbisyo, sumpay ni Salcedo.

Ang maong resolusyon gipaluyohan usab sa komite sa pamalaod ug reglamento ni Konsehal Edgar Cabanlas. (RNQ/SP)