Annual Budget sa Brgy. No. 10 giaprobahan sa konseho

DUGANG kaugmaran ug kalamboan ang gipaabot matagamtaman sa katawhan sa Barangay no.10 ning tuig 2020.

Kini human ang konseho sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay nga may kalabutan sa ilang Annual Budget nga adunay gibana banang kinitaan ug galastohon balor P3,696,832 gikan sa Enero ngadto sa Disyembre.

Lakip sa gipunduhan ug gihatagan sa prioridad sa barangay ang pagpanghinlo sa ilang drainage, pagrehabilitar sa canal, pag-instalar ug pagmintinar sa suga sa kadalanan ug pagrehabilitar sa ilang multi-purpose.

Sa laing bahin, migahin usab ang barangay og igong pundo aron magamit sa pagpatuman sa programa sa kabatan-unan ug uban pa nga gilantawng maghatag karangan sa kinabuhi sa katawhan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ug reglamento ni Konsehal Ian Mark Nacaya.