Annual Budget sa Besigan giuyonan sa Konseho

GIUYONAN ug gideklarang hingpit nga mapatuman  ang ordinansa sa Sangguniang Barangay sa Besigan ning dakbayan  pinaagi sa resolusyon nga gisagop sa konseho  sa sesyon kagahapon nga gidumala ni Bise Mayor Bebot Rodriguez  nga may kalabotan sa ilang 2026 Annual Budget.

Subay sa maong ordinansa, ang Barangay Besigan adunay gibana-banang kinitaan ug galastohon  nga ₱5,757,588 alang karong tuiga nga maoy gamiton sa pagpatuman sa mga batakang serbisyo, programa, ug mga proyekto sa kalamboan sa maong barangay.

Gilauman nga ang pag-implementar niini magsugod dayon sa petsa nga gitakda sulod sa maong ordinansa aron masiguro ang hapsay nga pagserbisyo ngadto sa mga residente sa Besigan.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Ed Cabanlas. (JRG/SP)