AIP sa tuig 2022 gisuportahan ni Konsehal Abaday

DAKO ang pagtuo ni konsehal Roger Abaday, chairman sa komite sa senior citizen sa konseho nga nakahan-ay sa insaktong mga plano ug programa sa gobyerno local ang Annual Investment Plan alang sa tuig 2022.

Kini ang opinion ni Konsehal Abaday sa maong hisgutanan atol sa sesyon ni-adtong Lunes nga gidumala ni Vice-Mayor Kikang Uy.

Sumala ni Abaday nga gitumbok ug prioridad sa maong programa mao ang nag-unang gikinahanlang serbisyo sa katawhan sa dakbayan.

Dugang sa konsehal nga kun dili makab-ot sa syudad ang gi-target niini nga koleksyon diskrisyon na sa ehekutibo ang pag-implementar sa prioridad niini nga mga proyekto.

Nunot niini gihanyo ni Abaday ang iyang mga kauban sa konseho nga motambong sa pagahimoong budget hearing aron mapaminaw nila ang mga gipangduso nga budget ug aron makahatag usab sila sa ilang sugyot ug opinion.