Abusado nga sakop sa RTA angayan disiplinahon-Ocon

KUN masuta ug mapamatud-an nga adunay pag-abuso nga nahimo sa pipila ka miembro sa Roads and Traffic Administration (RTA) sa ilang pag-imposar sa dagan sa trapiko sa syudad angayan kining erekomendar sa mayor nga tangtangon sa panerbisyo.

Kini ang reaksyon ni Ocon sa gipadangat nga special report ni Konsehal Ian Mark Nacaya atol sa sesyon niadtong Lunes nga gidumala ni Bise Mayor Kikang Uy mahitungod sa mulo sa usa ka sidewalk vendor nga diin gipanghakot ang iyang baligya sa mga sakop RTA ug gidala kini nga walay pag-isyu sa recibo.

Sumala ni Ocon nga iyang nahinumduman ang gihimo sa miembro sa RTA ngadto sa vendor nga mamaligya-ay ug balot nga basta nalang gipanglabay sa mga sakop sa RTA ang mga baligya niini.

Hinoon giklaro ni Konsehal Ocon nga dili tanan mga kawani sa RTA ang nag- abusar sa ilang trabaho daghan pa gihapon ang mga tarong sa ilang katungdanan.

Nunot niini gisugyot ni Ocon nga kun makita nga adunay kalapasan ang nahimo niini nga kawani sa RTA angayan lang nga erekomendar kini sa opisina sa mayor nga tangtangon sa iyang trabaho.

Alayon niini giduso ni Bise-Mayor Kikang Uy ang maong reklamo sa komite sa roads and traffic management ni Konsehal Romeo Calizo alang sa tukmang disposisyon ug rekomendasyon.