top of page

Abaday nangusog maablihan na mga sabongan sa CDO

SI Konsehal Roger Abaday, chairman sa komite sa games and amusement, naninguha nga matabangan ang mga nanag-iya og sabongan sa syudad nga matugotang maka-operate sa ilang negosyo human sa kapin sa duha ka tuig nga pagsira tungod sa pandemya.

Sa tigom sa komite kagahapong adlawa, si Abaday mibutyag nga gisabot niya ang kahingawa sa mga sabungero apan tungod kay igo man lang usab gasunod ang lokal nga kagamhanan sa mga gabayan ug mandato gikan sa Department of Health (DOH) ug IATF.

Mahinumduman nga subling gihangyo sa nanag-iya og sabongan nga unta makabalik na sa ilang operasyon dala ang pasalig nga mosunod sa hingpit sa gisitar nga minimum health standards.

Ang maong lakang paborableng gisuportahan ug girekomendar sa komite ngadto sa buhatan sa ehekutibo uban ang panghinaut nga makonsidera ang hangyo sa mga nanag-iya ug tigdumala sa mga sabongan.

Dugang pa, gitambagan usab ni Abaday ang mga tigdumala nga mobisita sa buhatan sa mayor aron mapasabot ang ilang mga hangyo.


Comments


bottom of page