Abaday nahingawa sa nagkadaghang ‘rugby boys’

GIKAHINGAWA ni Konsehal Roger Abaday, chairman sa komite sa public order and safety, ang gipadangat nga datus gikan sa Cagayan de Oro City Police Office ug sa City Social Welfare and Development Department kabahin sa ilang operasyon batok sa mga minors nga gasinlok og rugby.

Segun sa taho nga nadawat ni Abaday, mokabat sa 175 ka mga minor de edad ang na-rescue sa CSWD gikan sa bulan sa Enero hangtod Mayo ning tuig samtang 27 usab ang nalambigit sa rugby ug 106 sa paglapas sa curfew ordinance.

Sumala ni Abaday nga lisod ang pag-rescue sa mga minor de edad nga anaa sa kadalanan ug nag-sinlok og rugby tungod kay kon makita nila ang Police nga mag-siren o’ bisan red light pa, dayon naman sila sa pagdagan.

Busa dako og partisipasyon sa kabarangayan aron kini masumpo, matod ni Abaday.

Dugang sa konsehal atol sa tigom sa komite sa public order and safety, komite sa barangay affairs ug sa komite sa trade and commerce, nga angayan na ang hugot pagpatuman sa balaod ug kinahanglan usab kining ma-amendahan tungod sa kagamay sa mga multa alang niadtong makalapas niini.

Malaumon si Konsehal Roger Abaday nga sa sunod tigom sa komite pinaagi sa hiniusang sugyot ug rekomendasyon sa nagkadaiyang ahensya sa goberno, makab-ot na ang pinal nga balaod alang sa nasangpit nga katuyoan. (MLR/SP)