Abaday misugyot palapdan sa barangay ang pagbansay alang sa pagresponde sa sunog

GISUGYOT ni Konsehal Roger Abaday, chairman sa komite sa public order and safety, nga palapdan pa sa kabarangayan ang ilang pag-monitor o pagbansay-bansay aron masiguro ang daling pag-responde sa tawag sa panginahanglan sa ilang mga katawhan sa barangay.

Kini ang gipa-ambit nga pamahayag ni Abaday atol sa sesyon niadtong Lunes nga gidumala ni Bise Mayor Bebot Rodriguez tungod sa sunod-sunod nga nahitabong sunog sa syudad.

Sumala ni Abaday nga tipik sa himoon nga mas makaayo ug makatabang sa barangay ang pagpahigayon og regular nga pagbansay-bansay sa mga barangay police, sigurohon nga luag ang kadalanan aron dili lisod ang pagsulod sa sakyanan sa mga awtoridad ug 24/7 nga pag-bantay sa matag barangay alang sa kasigurohan sa mga molopyo.

Niini nga pamaagi posibleng mapakgang pa ug dili na mokuyanap ang sunog tungod sa daling pag-responde sa mga opisyal sa barangay.

Malaumon si Konsehal Roger Abaday nga mapatuman ang maong sugyot. (MLR/SP)