Abaday mihangyong masuportahan Karatedo CDO team

NAGSUGOD na ang pagbansay bansay sa Cagayan de Oro Karatedo Team alang sa gitakdang Batang Pinoy Games karong tuiga.

Kini ang gibutyag ni Konsehal Roger Abaday, chairman sa komite sa Games and Amusement, sa sesyon sa Konseho niadtong Lunes nga gidumala ni Bise Mayor Kikang Uy, human iyang gipresentar ang mga atleta nga morepresentar sa dakbayan.

Si Abaday mibutyag nga taas nang panahon ang gigahin sa pagbansay-bansay sa mga athleta aron mahimong magmalampuson sa ilang tinguha nga makadala sa tungog ug garbo sa syudad.

Niini, si Abaday naghangyo ug nanawagan sa tanan nga suportahan ang kabataan nga naningkamot sa ilang kampanya sa maong torneo nga makahakot sa mga medalya sa umaabot bulan sa Hunyo o Hulyo, ning tuiga.

Samtang gipadangat ni Abaday ang iyang pagpasalamat ngadto sa mga coaches sa CDO Karatedo team nga naglangkob nila ni Junie Ocular, Jessica Esparago sa Japan Karate Association, Junrey Ano-os ug uban pa sa ilang paghatag sa maayong giya sa mga atleta.