Abaday gihingugang ablihan na ang E-Games sabong ug sinehan

TUNGOD sa nakitang pag-ubos sa kaso sa COVID-19 sa syudad gihangyo ni Konsehal Roger Abaday, chairman sa komite sa Games and Amusement, ang Local IATF nga lakip konsiderahon niini nga paga abrihan ang operasyon sa E-Games ug ang sabong sa syudad.

Kini ang gipadangat nga special report ni Abaday atol sa sesyon niadtong Lunes nga gidumala ni Bise Mayor Kikang Uy, sumala ni Abaday nga ang pagkunhod sa kaso sa COVID-19 epekto kini sa massive vaccination drive sa goberno diin ang pagbakuna sa

katawhan maoy labing epektibo nga panagang aron dili kita dali matakdanan sa maong virus.

Niini matud ni Abaday nga angayan na usab konsiderahon ang pag-abri sa operasyon sa E-Games, sabong ug sinehan kay looy ug dako na kaayo ang pagka-alkanse sa maong mga negosyante tungod niini nga pandemya ug gani daghan usab sa ilang mga trabahante ang nawad-an sa ilang kinitaan.

Dugang ni Abaday nga ang pag-abri sa mga patigayon sa syudad nagpakita lamang kini nga mihinay hinay na ug buhi ang atong ekonomiya.

Niini naglaum si Abaday nga susama sa ubang patigayon mahatagan usab kini sa konsiderasyon diin ubos gihapon sa ilang pagsunod sa minimum health protocols sa goberno.

Nunot niini ang maong sugyot ni Abaday giduso kini sa buhatan ni Mayor Oscar Moreno ug sa Local IATF alang sa tukmang aksyon ug disposisyon.