𝐀𝐛𝐚𝐝𝐚𝐲 𝐮𝐲𝐨𝐧 𝐩𝐚𝐠𝐡𝐚𝐭𝐚𝐠 𝐩𝐫𝐨𝐭𝐞𝐤𝐬𝐲𝐨𝐧 𝐬𝐚 𝐦𝐠𝐚 𝐭𝐮𝐥𝐮𝐧𝐠𝐡𝐚𝐚𝐧 𝐬𝐚 𝐬𝐲𝐮𝐝𝐚𝐝

SUPORTADO ni Konsehal Roger Abaday, chairman sa komite sa public order and safety, ang sugyot ordinansa nga giduso ni Bise Mayor Bebot Rodriguez tumong sa pagpalig-on sa seguridad sa mga pang-publiko ug pribadong tulunghaan sa syudad.

Matud ni Abaday mapakgang lamang ang mga insidente sulod sa tulunghaan pinaagi sa pagpahigayon sa mandatory threat assessments, referral and reporting mechanism, mental health support services, physical security infrastructure, emergency alert system, campus access control, law enforcement coordination ug responsible firearm safety education.

Sumala sa konsehal nga mao ni ang sumbanan aron matunol ang mga panginahanglanon sa mga tulunghaan aron masiguro ang seguridad sa kabataan ug mga magtutudlo ug malikayan subli ang krimen sama sa nahitabo didto sa Tacloban City.

Gipaluyohan usab ni Abaday ang paggahin og igong pundo alang sa nasangpit nga balaod.Nagtuo si Abaday nga mapagaan ang kabalaka sa mga ginikanan kun hingpit kining mapatuman sa labing dali nga panahon.

Malaumon ang konsehal nga pinaagi sa kooperasyon ug pagtabang sa tanang ahensiya sa goberno, makab-ot sa syudad ang mga programa nga makatabang sa katilingban. (MLR/SP)