722 benepisaryo sa Housing Program gipangandaman

GIKALIPAY ni konsehal Edgar Cabanlas, chairman sa komite sa urban & rural poor and housing development, nga ang opisina sa City Housing & Urban Development Department (CHUDD) ubos ni Engr. Ermin Stan B. Pimentel nagsugod sa paghigayon og orientation seminar alang sa unang batch sa 722 ka mga benepisaryo sa housing program sa dakbayan.


Ang maong mga benepisaryo mga biktima sa bagyong Sendong ug dugay nang naghulat nga makabaton sa kaugalingong mga pinuy-anan.


Ang proyekto gitukod dinha sa sitio Pahiron, Lumbia.


Sumala ni Cabanlas nga ang panaghiusa ug pagtinabangay mibunga sa kalampusan sa programa.

Niini, siya nagpadangat sa iyang pasalamat kang Mayor Oscar Moreno ug sa mga sakop sa konseho ubos ni bise mayor Kikang Uy ug sa opisina sa CHUDD sa paningkamot nga mapadali ang proyekto ug matunol ngadto sa mga benepisaryo.


Malaumon si Cabanlas nga daghan pang mga kabus ang makapahimulos sa programa nga ang katuyu-an mao ang pag-alagad sa katawhang nanginahanlan.