3 infra projects sa DPWH-10 nakompleto na pagtrabaho


TULO ka mga proyekto sa imprastraktura nga gipatuman sa rehiyonal nga buhatan sa Department of Public Works and Highways (DPWH-10) dinhi sa dakbayan sa Cagayan de Oro ang nakompleto na pagtrabaho.


Kini ang kasayuran nga nadawat ni bise mayor Kikang Uy gikan ni District Engr. Virginia Batocail sa 1st District Engineering Office human gisumete ang binulang taho alang sa milabayng bulan sa Abril 2021.


Lakip sa nakompleto pagtrabaho mao ang pagsemento sa dalan dinha sa barangay Balulang, pagsemento sa circumferential road dinha dapit sa Upper Carmen Elementary School sa barangay Carmen ug pagtukod ug pagtul-id sa Multi-Purpose building sa barangay Carmen.


Ang kanunay nga pagtambayayong sa lokal nga kagamhanan ug mga ahensya sa nasudnong kagamhanan magsilbing dalan aron maangkon ang dugang kalamboan alang sa kaarangan sa kinabuhi sa katawhan, pamahayag ni bise mayor Kikang Uy.


Niini, ang ahensya padayon usab nga nagpatuman sa pagtrabaho sa pipila ka mga proyekto imprastraktura dinhi sa syudad sama sa farm to market road dinha sa barangay Dansolihon nga mobalor og P10 milyones ug gilantaw nga makompleto pagtrabaho sulod sa 75 ka adlaw.


Nasayran nga ang proyekto gisugdan sa pagtrabaho niadtong Abril 13, 2021 ug gilantawng matibawas sa pagtrabaho sa umaabot Hunyo 26, 2021. (SP)