top of page

2023 SK budget sa Brgy 32 mapatuman na


KAPIN sa P100 mil ang gigahin sa Sangguniang Kabataan (SK) sa Barangay 32 aron magamit dinha sa pagpatuman sa mga giandam nga mga programa alang sa pagproteher sa kinaiyahan, capability building, good governance, ug active citizenship sa kabatan-onan.


Kini human ang Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa resolusyon sa Barangay 32 diin nasukip ang 2023 SK Annual Budget nga adunay gibanabanang kinitaan ug galastohon balor P500,252.00.


Gihatagan usab sa prayoridad sa SK sa barangay nga mapatuman karong tuiga ang programa sa gender sensitivity, paugnat sa kusog, ug pagpakatap sa tukmang impormasyon ilabina kabahin sa panglawas, kampanya kontra droga, kalinaw ug seguridad, ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.


Ang maong budget sa SK sa barangay miagi sa makuting pagtuon ug deliberasyon sa mga hintungdang ahensya sa gobyerno ug mahimo nang ipatuman sa labing daling panahon.


Ang resolusyon nga gisagop sa Konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Edgar Cabanlas.


Comentarios


bottom of page