top of page

2023 SK Annual Budget sa Brgy no. 6 mapatuman na


Gilantaw nga mapalambo pa ang mga programa ug proyekto alang sa kabataan diha sa Barangay No. 6 ning syudad.


Kini human ang konseho sa syudad ubos ni Bise Mayor Bebot Rodriguez, sa sesyon kagahapon, misagop sa resolusyon nga nag-uli sa resolusyon sa barangay diin nasukip ang 2023 SK Annual Budget nga adunay gibanabanang kinitaan ug galastohon balor P270,527.00.


Ang maong pundo gikuha gikan sa 10% Development Fund sa barangay subay sa probisyon sa RA 10742 kon Sangguniang Kabataan Reform Act of 2015 aron gamiton sa pagpatuman sa mga programa ug proyekto sa kabatan-onan sa barangay.


Tipik sa ilang gihatagan prayoridad sa maong budget angpagpahigayon sa programa alang sa tukmang edukasyon kabahin sa panglawas, youth employment and livelihood, pagproteher sa kinaiyahan, kalihokan pahaom sa kasaulogan sa Linggo ng Kabataan ug uban pa nga gilantawng maghatag og kaarangan sa serbisyo sa ilang ginsakopan.


Si Konsehal John Michael Seno, chairman sa Komite sa Sports and Youth Development ug usa sa nagpaluyo sa gisagop nga resolusyon, misuporta sa maong lakang human nakita nga nahisubay kini sa balaod ug dako og ikatabang sa mga kabatan-onan sa ilang dapit.


Ang resolusyon nga gipalabang sa konseho alang sa maong katuyoan gipaluyohan usab sa Komite sa Pamalaod ni Konsehal Edgar Cabanlas.

Коментарі


bottom of page