Dugang kaarangan sa mga mag-uuma sa CdeO gilantaw

Gilantaw nga mahatagan sa dugang pa kaarangan ang kinabuhi sa mga mag-uuma sa syudad.

Kini human ang konseho sa dakbayan ubos ni bise mayor Kikang Uy nagtuon sa sugyot balaodnon nga mag-aprobar sa Memorandum of Agreement tali sa kagamhanang lokal ug Departamento sa Agrikultura alang sa kalamboan sa agricultural resources.

Ang maong lakang magseguro nga mausbawan ang abot ug kinitaan sa mga mag-uuma.

Ang proyekto nga ipatuman sa DA RFO 10 naglakip sa pagpalit og duha ka Forage Chopper nga itunol ngadto sa Mountain View Dairy Cooperative sa barangay Mambuaya ug Northern Mindanao Dairy Farmers Association ug usa ka Feed mixer nga itunol pabor sa CLGU alang sa Cagayan de Oro Stock Farm dinha sa barangay Balubal.

Nasayran nga ang proyekto nunot sa tahas sa departamento paghatag og kalamboan sa natad sa agrikultura pinaagi sa bottom-up self-reliant training systems approach.

Ang maong sugyot MoA giduso ni bise mayor Kikang Uy ngadto sa komite sa agrikultura ni konsehal Annie Daba alang sa dugang pagtuon ug rekomendasyon. (SP)