Kikang, 2019 Outstanding Local Legislator sa nasud

Usa si bise mayor Kikang Uy sa mga magbabalaod sa tibouk nasud nga gipasidunggan sa Superbrands Marketing International (SMI) isip Outstanding Local Legislator sa kasamtangang tuig.

Kini human si Harry Tambuatco, presidente ug CEO sa SMI, mipahibalo sa bise mayor nga usa siya sa mga napiling opisyal sa lokal nga kagamhanan gumikan sa kaligdong sa iyang pagpanerbisyo.

Ang pasidungog usa ka paagi sa pag-ila sa kalampusan nga naangkon ni bise mayor Kikang Uy dinha sa iyang pagdumala sa ika-18 nga konseho sa dakbayan sa Cagayan de Oro nga giingong nakaamot sa pagpanday sa kalamboan dili lang sa syudad kun dili sa tibouk nasud, pamahayag ni Tambuatco.

Niini, ang bise mayor modawat sa Award Certificate karong adlawa didto sa kaulohan. Ang SMI usa ka award-giving body nga nalambigit sa consumer ug service products nga nag-ila sa mga talagsaon ug maligdong nga binuhatan sa mga opisyal sa lokal nga kagamhanan.

Sa pasidungog karong tuiga, duha lang ka bise mayor sa mga syudad sa tibouk nasud ang napasidunggan. Uban ni bise mayor Kikang Uy mao si bise mayor Roseller Rizal sa Calamba City, Laguna. (SP)