Dugang kaarangan sa CdeO naangkon

Si Konsehal Zaldy Ocon, chairman sa komite sa public Works, madasigong nagpaabot sa mga dugang dagkong kalamboan nga ang nahatagan og dakong benepisyo ang katawhan sa syudad.

Atol sa flag raising ceremony sa City Hall niadtong Lunes, si Ocon mibutyag nga ang kagamhanan migahin og pundo aron mapatuman ang mga proyekto sa imprastraktura nga gihatagan sa prioridad.

Lakip niini mao ang pagtukod sa mga lawak saringan sa lain laing tunghaan sa mga barangay ug ang pagsemento sa 172.7 ka kilometrong kadalanan sa dakbayan.

Segun sa taho sa buhatan sa City Engineers, sa tuig 2013-2014 nagtukod og 187 ka classrooms; 252 classrooms sa tuig 2015; unom ka classrooms sa tuig 2016; 38 sa tuig 2017; 54 sa tuig 2018 ug 48 sa tuig 2019.

Dugang pa, ang pagtukod og 250 classrooms alang sa City Central School nga hitsas sa facilidad alang sa mga tinun-an.

Ang kagamhanan migahin og P1.5 bilyones alang sa mga proyekto sa imprastraktura usa niini mao ang pagpatuman sa pagsemento sa kadalanan paingon sa Barangay Besigan, ning syudad. Kini dakong tabang sa mga mag-uuma kay sayon na pagdala sa ilang mga produktong agrikultura dinhi sa sentrong bahin sa syudad.

Malaomon ang konsehal pinaagi sa maong mga proyekto nga daghang kabataan ang madasig sa pagtungha og makatapos sa pag-eskwela kay anaa na sa ilang tugkaran ang de kalidad nga edukasyon. Daghan usab nga mga mag-uuma ang mahatagan og pag-asenso kay mosaka ang kinitaan, pamahayag ni konsehal Ocon. (SP)