DP sa Ecoverde Homes giuyonan sa konseho


Dugang 234 ka panimalay ang matukod diha sa barangay Indahag, ning syudad.


Kini human ang konseho sa sesyon niadtong Lunes nga gidumala ni bise mayor Kikang Uy mipalabang og ordinansa nga nag-aprobar sa aplikasyon sa MCDC Ecoverde Homes Corporation alang Development Permit sa Ecoverde Sierra Phase 2 Subdivison project nga adunay gilapdon nga 22,538 metros kwadrados.


Nasayran nga ang dapit diin tukuron ang proyekto nasusi na sa komite sa subdivision ni konsehal Dometilo Acenas uban sa mga hintungdang ahensya sa kagamhanan ug miluwat na usab sa ilang rekomendasyon.


Si Acenas mipasabot nga giuyunan sa konseho sa syudad ubos ni bise mayor Kikang Uy ang maong lakang sa kondisyon nga tumanon ang tanang kondisyon nga girekomendar sa City Engineer’s Office (CEO) ug City Planning and Develoment Office (CPDO).


Ang ordinansa nga gipalabang sa konseho alang sa maong katuyuan gipaluyuhan sa komite sa subdivision and landed estate ni konsehal Acenas ug komite sa pamalaod ni konsehal Ian Mark Nacaya. (SP/Yonggals)