Kon. Daba miaghat sa katawhan magnegosyo pagbuhi og bangus

Nag-una nga produkto sa aquaculture sa nasud ang pagbuhi og bangus sa dagat.

Kini ang aghat ni konsehal Annie Daba, chairman sa komite sa agrikultura, sa tanang mangingisda o bisan sa mga molopyo sa dakbayan sa tinguha nga maagni kini sa pagsuway sa maong negosyo kay makahatag man sa dugang kaarangan sa panginabuhi.

Ang agribusiness sama sa pagbuhi og bangus sa fishcage nagkinahanglan og dako nga pohunan apan ang kita dako usab, taas ang kinitaan sa panginabuhian. Dako ang atong kitaon, sumpay sa konsehal.

Siya mipasabot nga usa kini ka alternatibo sa kapanginabuhian ug maayo kaayo nga negosyo niining hulaw nga panahon. Sulod lamang sa 4-6 ka bulan ang pag-amuma og duha ka beses mag-ani niini. Mas bintaha maghimo og fishcage sa dagat kumpara sa tab-ang nga tubig (fishpond) kay mas lami ang bangus kay kanunay presko ang tubig.

Gitumbok ni Daba nga ang pagbuhi og bangus nagkinahanglan usab og sakripisyo, paghatag og panahon, pag-atiman, pagmintanar sa pagbahog gamit ang aqua feeds finisher aron sakto ang ani og makaangkon sa de kalidad nga produkto.

Malaomon ang konsehal nga adunay daghang mangingisda nga mosagop sa maong matang sa negosyo aron dili mokunhod ang supply sa atong kamerkadohan. (SP/Thurax)

Modernisasyon

sa transportasyon sa Cagayan de Oro gihingusgan ni Lao

Kusganong gihingusgan ni konsehal Bong Lao, chairman sa komite sa public utilities, nga matibawas ang pagmugna sa Local Public Transport Route Plan (LPTRP).

Kini aron mapatuman na dinhi sa dakbayan ang modernization program sa natad sa transportasyon.

Sumala ni Lao nga subling magtigom ang komite ugmang adlawa, Abril 5, 2019 dinha sa hawanan sa konseho aron tukion ug sutaon ang mga kakulangon sa plano sa tinguha nga mapatuman na kini.

Siya midugang nga kun ma-implementar ang plano, dili na maglisod ang katawhan sa ilang pagpanakayan kay usa sa gitinguha sa programa ang paggamit sa mga modernong bus nga maoy mamasahero libot sa syudad.

Lakip sa gitinguhang masilbihan mao ang mga molopyo sa bukid bukid nga bahin sa syudad nga ang ruta direkta na sa sentrong bahin sa dakbayan, sumpay ni Lao.

Gilauman usab ni konsehal Lao ang pag-abli sa mga bag-ong dalan sa syudad nga lakip nga marutahan niining atong public transport nga makatabang nga makunhoran ang bagang duot sa sakyanan sa sentrong bahin sa syudad.

Nunot niini, matod ni Lao nga himuon niya ang tanan nga mahuman sa labing dali nga panahon ang paghimo sa LPTRP aron makatabang kini sa katawhan. (SP/El Kapitan)