Milk Feeding Program ipatuman sa syudad

Gilantaw nga mapatuman dinhi sa dakbayan sa Cagayan de Oro ang Community/School Milk Feeding Program (MFP).


Kini human gitun-an sa konseho sa syudad ubos ni bise mayor Kikang Uy ang gisugyot nga Memorandum of Agreement (MoA) tali sa kagamhanan sa dakbayan ug National Dairy Authority (NDA).


Sa pagpatuman sa programa ang dakbayan gikinahanglan nga mogahin og P959 mil kapin isip paatbang pundo sa sharing scheme tali sa NDA alang sa hingpit nga pagpatuman.


Nasayran nga ang mga benepisaryo sa programa mao ang mokabat sa 1,230 ka mga tinun-an sa day care, preschool ug elementarya gikan sa lain laing mga tunghaan sa syudad alang sa 120 ka feeding days.

Pinaagi niini, gilantaw nga mapalambo ang nutritional status sa mga malnourished nga kabataan sa syudad pinaagi sa paggamit ug pag-inom sa gatas ug ubang milk products.


Sa susamang paagi, matabangan usab sa gobyerno ang mga local dairy farmers tungod kay gikan kanila ang mga i-apod apod nga mga produkto ngadto sa mga kabataan.

Ang maong sugyot MoA giduso ni bise mayor Kikang Uy ngadto sa komite sa panglawas ni konsehal Malou Gaane ug komite sa agriculture ni konsehal Annie Daba alang sa dugang pagtuon ug rekomendasyon.