Lao miaksyon sa hangyo sa Oro Taxi Fed


Giindorso ni konsehal Teodulfo Lao Jr, chairman sa komite sa public utilities, ngadto sa buhatan sa Land Transportation Franchising Regulatory Board (LTFRB-10) ang hangyo ni Allan Gamba, chairman sa Metro Cagayan de Oro Taxi Federation.


Sa milabayng tigom sa komite, gipasabot ni Lao nga wala silay gahum nga mobabag ug mohatag ngadto ni bisan kinsa nga gustong mangayo og prankisa alang sa maong katuyuan.


Dugang ni Lao nga dili mapugngan kun kinsa ang gustong magnegosyo sa taxi kay ila usab kanang katungod. Hinuon, iyang gisabot ang sentemento niini tungod kay apektado man ang ilang kinitaan kun magkadaghan ang pampublikong sakyanan sa syudad.

Mahinumduman nga gihangyo sa federasyon ngadto sa komite ni Lao nga ihunong na ang paghatag og dugang prankisa sa taxi units sa syudad tungod kay nagkadaghan usab ang colorum nga mga taxi nga nakaapekto usab sa operasyon sa mga lehitimong taxi units.


Nunot niini, giduso ni Lao ngadto sa LTFRB ang hangyo sa federasyon alang sa tukmang aksyon ug rekomendasyon. (El Kapitan)