Taxi operators, katawhan angay’ng dapiton sa tigom sa Public U –Nadya

Suportado ni konsehal Nadya Emano-Elipe, chairman sa komite sa labor, ang panawagan ni konsehal Teodulfo Lao Jr. atol sa milabayng sesyon sa konseho kalabot sa pagsuspende sa gipatumang omento sa pletihan sa taxi.

Mahinumduman nga ang konseho sa syudad ubos ni bise mayor Kikang Uy misagop sa Resolosyon No. 12985-2018 nga naghangyo sa LTFRB nga isuspende ang pagpatuman sa bag-ong pletihan aron mapahigayon ang konsultasyon tali sa mga sumasakay ug mga nalambigit sa operasyon sa taxi.

Matud ni Nadya nga gikatingala sa katawhan ang kalit nga pag-usbaw sa pletihan nga walay igong konsultasyon sa katawhan.

Maayo unta nga mapangitaan kini sa paagi kay dugang pas-onon kini sa katawhan ilabina nga misaka usab ang presyo sa mga batakang palaliton gumikan sa pagsaka sa presyo sa mga produktong petrolyo, pamahayag ni Nadya.

Niini, gisugyot sa konsehal nga lakip sa dapiton sa ipahigayong tigom sa komite sa Public Utilities ni konsehal Bong Lao ang mga taxi operators aron masayran ang rason sa ilang petisyon alang sa maong omento ug ang mga sumasakay aron adunay pagbinayloay sa hunahuna ug sa pamasin nga makab-ot ang tukmang solusyon.

Nunot niini, naglaum si konsehal Nadya nga mapaminawan ug makonsidera sa kadagkoan sa LTFRB ang panawagan sa katawhan kalabot niini nga isyu. (El Kapitan)