Classroom dihas Mother Teresa Center matukod

Hayan mahatagan na sa kasayon sa ilang pagtuon ang mga kabus nga kabataang nanimuyo dinha sa Mother Teresa oro Care Center for Children sa barangay Bugo.

Kini human ang konseho sa syudad ubos ni bise mayor Kikang Uy mipalabang sa ordinansa nga naghatag og katungod ni mayor Oscar Moreno pagpirma sa Memorandum of Agreement (MoA) tali sa Inner Wheel Club West CDO.

Ang maong MoA naglangkob sa pagpatuman sa proyekto pagtukod og usa ka unit nga classroom/center alang sa mga batang tinun-an kinsang mga pamilya nasakop sa mga marginalized sector sa nahisgutang sentro.

Dako ang panghinaut ni bise mayor Uy nga makatabang sa kabataan sa dapit nga maangkon ang hayag nga kaugmaon human sila mamatuto sa insaktong pamaagi.

Ang ordinansa nga gipalabang sa konseho alang sa maong katuyuan gipaluyohan sa komite sa edukasyon ni konsehal Suzette Magtajas-Daba ug komite sa pamalaod ni konsehal Ian Mark Nacaya.