Task Force Hapsay Cable sugdan sa Abril 17, 2018

Sugdan na sa umaabot Martes, Abril 17, ning tuig ang pagpanghinlo sa nagbitay nga mga cable palibot sa syudad.

Kini ang gikonpirmar ni konsehal Teodulfo Lao Jr., chairman sa komite sa public utilities.

Matud ni Lao nga unang hinloan sa Task Force Hapsay Cable ang palibot sa Osmena Street nga gilauman nga adunay masinati nga pagkalangan sa dagan sa trapiko.

Ang konsehal konsehal mihangyo sa katawhan sa gamay nga pagsabot ug konsiderasyon sa maong mga panahon nga himuon ang pagtangtang sa mga wires.

Hinuon, gitataw niini nga sa maong kalihukan kaabag man kanunay isip membro sa Task Force ang Roads and Traffic Administration (RTA) nga maoy tahas ang pagdumala sa trapiko.

Gipadangat usab ni konsehal Lao ang iyang pagpasalamat sa mga opisyal sa kapolisan ug Kapisanan nga mga Brodkaster sa Pilipinas (KBP) nga kaabag sa maong proyekto ug dako ang nahimong papel tungod kay sila man ang mopahibalo sa katawhan pinaagi sa mga pagsibya sa kahanginan.

Iya usab gikalipay ang pagtabang sa mga nagpakabanang pribadong sektor nga matud niya adunay himoong pagpinirmaha sa Memorandum of Understanding (MoU) tali sa syudad sa umaabot Lunes atol sa flag raising ceremony diha sa City Hall.

Alayon niini, nanghinaut si Lao nga magmalampuson ang proyekto pinaagi sa tabang ug kooperasyon sa katawhan. (El Kapitan)