PALC sa Breeza Subd project giuyonan sa konseho

Giuyonan sa konseho sa syudad ubos ni bise mayor Kikang Uy ang aplikasyon sa Johndorf Ventures Corporation alang sa Preliminary Approval and Locational Clearance

(PALC) sa proyektong Breeza Subdivision.

Ang proyekto nahimutang sa barangay Carmen nga adunay gilapdon nga 204,524.62 square meters ug gibahin bahin ngadto sa 677 ka mga lote ug units.

Si konsehal Dometilo Acenas, Jr., chairman sa komite sa subdivision ug usa sa mga nagpaluyo sa ordinansa, mibutyag nga sa ordinansa nga gipalabang sa konseho, gipahamtang ang mga kondisyon nga angayang masunod sa pagsumete sa kompanya sa ilang aplikasyon alang sa Development Permit.

Kini naglakip sa pagtukod og dalan nga magkonektar sa 16m road diin ang main road magsukod og 12 metros kalapad, paglagda og kasabutan tali sa Victor’s Subdivision Phase 2 alang sa gisugyot nga outfall nga moagi sa nahisgotang subdivision,

paglatid sa consolidated drainage lay-out plan, pagbutang og detention pond ug right of way ug drainage structure sa offsite drainage nga magkonektar sa natukod nang functional drainage system.

Ang ordinansa nga gipalabang sa konseho alang sa maong katuyoan gipaluyohan sa komite sa subdivision ni Acenas ug komite sa pamalaod ni konsehal Ian Mark Nacaya.