Daling pagbayad sa Philhealth Capitation Fund gihingusgan

Sa tinguha nga ma-promote ang efficienteng pagbayad sa Philhealth Capitation Fund, ang konseho sa syudad ubos ni bise mayor Kikang Uy mihatag og pag-uyon sa paggamit sa dakbayan sa DOH-Integrated Clinic Information System (iClinicSys) Electronic Medical Record (EMR) System.

Sa sesyon sa konseho kagahapon, ang konseho mipalabang sa ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa kadagkoan sa rehiyonal nga buhatan sa Department of Health (DOH-10) nga naglangkob sa paggamit sa record system.

Si konsehal Malou Gaane, chairman sa komite sa panglawas ug usa sa mga komiteng nagpaluyo sa gipalabang nga ordinansa, mipasabot nga pinaagi sa maong Information System mapadali ang pagkuha sa record sa tanang molopyo sa syudad nga rehistrado sa Philhealth ilabina dinha sa mga Health Centers.

Sa maong paagi, dali usab nga mabayran sa Philhealth ang matag admission sa mga pasyente, sumpay sa konsehal.

Sa MoA, ang lokal nga kagamhanan adunay kaakuhan nga dili mopagawas, distribute, disseminate o’ mobaligya sa iClinicSys o’ mohatag og panugot sa uban nga makakuha og kopya sa maong information system gawas lang sa tumong nga gitugot sa DoH.

Niini, ang tanang makuha nga data magpabiling gipanag-iyahan sa dakbayan bisan pa sa panahon nga mo-expire na ang MoA.

Ang MoA molungtad lang sulod sa usa ka tuig.

Ang ordinansa nga gipalabang sa konseho gipaluyohan sa komite sa panglawas ni konsehal Gaane ug komite sa pamalaod ug reglamento ni konsehal Ian Mark Nacaya.