Mga programa sa Brgy 27, Tumpagon mapatuman na

Hayan mapatuman na sa konseho sa barangay 27 ug Tumpagon ang ilang mga programa ug proyektong gipundohan karong tuiga.

Kini human ang konseho sa syudad ubos ni bise mayor Kikang Uy misagop sa managlahing resolosyon nga nag-uli sa ordinansa nga gipalabang sa maong duha ka barangay diin nasukip ang ilang Annual Budget karong tuiga.

Ang mobalor P3.34 milyones nga budget sa Barangay 27 naglakip sa pagpatuman sa P399 mil kapin nga pundo alang sa 20% Development Fund, P161 mil kapin alang sa 5% Local Disaster Risk Reduction Management Fund ug igong pundo pagpatuman sa ilang mga proyekto sa imprastraktura.

Sa maong 20% DF, nasukip ang paglimpyo sa mga kanal ug drainage ingon man rehabilitasyon sa ilang multi-purpose building-canopy.

Samtang ang budget sa Tumpagon mokapin P3.76 milyones. Lakip sa ilang gipundohan mao ang pagtul-id sa public stage, Daycare Center, Covered Court ug pagtul-id sa embankment ug regravelling sa kadalanan sa barangay.

Ang mga resolosyon nga gisagop sa konseho alang sa maong katuyoan gipaluyohan sa komite sa barangay affairs ni konsehal Alam Lim ug komite sa pamalaod ni konsehal Ian Mark Nacaya.