Waste Segregation Law sa Lumbia konsiderahon sa kom sa brgy affairs

Hayan mapatuman na sa Barangay Lumbia ang ilang Waste Segregation at source Law.

Kini human giduso sa barangay ngadto sa konseho sa syudad ubos ni bise mayor Kikang Uy aron matugutan nga mapatuman ang ilang gipalabang nga ordinansa nga gitinguhang maplastar ug mahan-ay ang paglabay sa mga basura aron mamintinar ang kalimpyo sa barangay.

Ang maong balaod sa barangay pinasubay sa Akta Republika 9003 kon Ecological Solid Waste Management Act of 2002, ang matag lokal nga kagamhanan gimandoan sa pagsagop sa systematic, komprehensibo ug ecological solid waste management program.

Gipasabot nga giila sa barangay ang ilang papel diha sa pagpatuman sa maong lakang pinaagi sa pag-divert sa mga basura pinaagi sa subling pagamit, pagrecycle, composting ug ubang resource recovery activities ug ang pag-establisar sa Material Recovery Facility sa ilang barangay.

Ang maong ordinansa sa Lumbia giduso ni bise mayor Kikang Uy ngadto sa komite sa barangay affairs ni konsehal Yan Lam Lim alang sa dugang pagtuon ug rekomendasyon. (Yonggals)