Ocon motuon sa hangyo sa taga-Zone 1, brgy Bulua

Konsiderahon sa komite sa urban poor ni konsehal Zaldy Ocon ang sulat hangyo nga sa mga molopyo sa Saarenas Extension sa Zone 1 Bulua, ning syudad.

Sa ilang sulat, gihangyo nga matabangan sila nga masemento ang ilang dalan ug matul-id ang ilang kanal.

Gipasabot nga dugay na kaayo ang maong kahimtang sa maong dalan ug gani nakahatag kini og kahasol kanilang mga molopyo ilabina panahon nga mag-ulan.

Matod usab nila nga ang kondisyon sa maong dalan maoy nakapaagni kanila nga modangop sa komite ni Ocon sa tinguha nga mahatagan sa igong pagtagad.

Sila malaumon nga pinaagi sa tabang sa komite mahatagan sa katumanan ang ilang gihangyo nga matul-id ang maong dalan alang sa kaayuhan tanang molopyo sa dapit. (Yonggals)