Random drug test padayong gipahigayon sa City Hall

Nagpadayon ang pagpahigayon sa random drug test sa mga kawani sa City Hall.

Kini nunot sa kampanya sa gobyerno ug sa panawagan ni Presidente Rodrigo Duterte nga mawagtang ang mga badlongong kawani nga nagumon sa gidiling druga.

Tinguha usab niini nga mahimong progresibo ang mga kawani diha sa ilang pag-alagad sa katawhan.

Sa kasayuran nga nahipos sa konseho, duha na ka buhatan sa City Hall ang napaubos sa drug testing ug kini gilangkoban sa buhatan sa City General Services ug City Local Environment and Natural Resources.

Ang pagpatuman sa programa pinaagi sa City Anti-Drug Abuse Council (CADAC) nga gipangunahan ni konsehal Romeo Calizo inabagan sa Philippine Drug Enforcement Agency (PDEA).

Aron patas ang pagpatuman sa programa, walay pagpahibalo kun unsang buhatan ipahigayon ang random drug testing.

Niini si Calizo, kinsa mao usab ang chairman sa komite sa police, fire and public safety, malaumon nga pinaagi sa programa mahunong na kadtong mga kawani nga nalambigit sa illegal nga bisyo aron usab ilang matarong ang ilang mga kinabuhi. (Yonggals)