Kikang miaksyon sa hangyo sa Macabalan

Daling giaksyonan ni bise mayor Kikang Uy ang hangyo gikan sa konseho sa barangay Macabalan nga madeklara ang porsyon sa accretion area sa ilang barangay nga ubos sa estado sa kalamidad.

Kini gumikan sa nahitabong sunog sa dapit niadtong Enero 7 ning tuig. Sa kasayuran nga nahipos sa konseho, mokabat sa 58 ka pamilya ang biktima sa maong kalamidad human ang ilang mga panimalay nasunog ug ang uban naugdaw.

Niini, ang barangay migahin og igong kantidad gikan sa ilang 5% Disaster and Risk Reduction Management Fund aron magamit nga ayuda ngadto sa mga biktima sa nahisgotang sunog.

Ang maong hangyo sa Macabalan giduso ni bise mayor Kikang Uy ngadto sa komite sa barangay affairs ni konsehal Yan Lam Lim alang sa pagtuon ug rekomendasyon. (Yonggals)