Lao motuon sa lakang did-an pagmaneho mga nakainom sa ilimnong makahubog

Konsiderahon sa komite sa public utilities ni konsehal Teodulfo Lao ang giduso ni konsehal Reuben Daba nga sugyot ordinansa nga magdili ingon man magpahamtang og silot alang niadtong mga magmaneho og sakyanan nga hubog o ubos sa implewensya sa ilimnong makahubog.

Ang maong sugyot ordinansa pinasikad sa Section 5 sa Article II sa 1987 Constitution nga naglatid sa kamahinungdanon sa pagmintinar sa kahusay ug kalinaw, pagproteher sa kinabuhi ug kabtangan ingon man ang pagpromote sa general welfare tungod kay kini bilihon sa katawhan ubos sa demokrasyang pamunuan.

Nunot sa probisyun sa maong batakang balaod, gideklara nga palisiya sa kagamhnan ang pagprotektar sa katawhan batok sa peligro dala sa pagmaneho nga ubos sa ilimong makahubog o druga nga maghatag og kadaot sa katawhan ug kabtangan.

Niini, gisugyot usab ang paggahin sa igong pundo nga maggamit sa pagpamalit sa mga gikinahanglang ekipo o’ test instrument nga gamiton sa pagsuta sa alcohol content sa lawas sa mga gisuspetsahang nagmaneho nga hubog nga kuhaon sa Annual o Supplemental budget sa syudad.

Gipasabot nga kinahanglan ang procurement nahisubay sa balaod ug lagda sa tukmang proseso. (Yonggals)