COCPO gipasidunggan isip best performer sa R-10

Gidayeg ni konsehal Romeo Calizo, chairman sa komite sa police, fire and public safety ang Cagayan de Oro City Police Office ubos ni City Police Director Roy Bahian.

Kini human gipasidunggan isip best performer sa Northern Mindanao ang maong kwerpo basi sa Unit Performance Evaluation Rating sa PNP 10 sa ilang accomplishment report sa fouth quarter sa tuig 2017.

Matud ni Calizo nga ang pagtunol sa pasidungog gipangunahan nila ni Mayor Oscar Moreno ug city DILG director Jane Docallos.

Nanghinaut ang konsehal nga pinaagi sa pag-ila sa paningkamot sa kapolisan mahimong mosamot pa kini sila sa kadasig sa ilang trabaho ilabina ang pagmintinar sa kahusay ug kalinaw sa atong syudad.

Niini naglaum si Calizo nga masustinahan sa kapolisan ang gipakitang performance kay ang paglambo sa dakbayan nagsumikad usab sa hugot nga seguridad kay walay negosyo nga mosulod sa usa ka lugar kun adunay samok ug gubot.

Nunot niini, gidasig ni Calizo ang kapolisan sa syudad nga doblehon pa nila ang ilang paningkamot aron sa ingon dili lang mahimong number one performer sa region 10 kun dili posibleng mahimo pa kining sumbanan sa kwerpo sa ubang dapit. (El Kapitan)