Ayudang pinansyal sa House of Hope gihangyong mausbawan

Paborableng girekomendar ni konsehal Reuben Daba, chairman sa komite sa katilingbanong serbiyo ang hangyo nga mausbawan ang ayudang pinansyal nga gitunol sa kagamhanan sa dakbayan ngadto sa House of Hope.

Kini sa tinguha nga matabangan ang fasilidad nga masolusyonan ang padayong pagtaas sa ilang mga mentally-challenged persons (MCP) nga kliyente.

Sa tigom sa komite kagahapon, ang representante sa City Social Welfare and Development mipasabot nga ang buhatan ug ang House of Hope padayong nagdawat sa mga kliyente sa tinguha nga mahawan usab ang kadalanan gikan sa nagkadaghang mga latagaw nga tawo, aduna may kabilinggan sa panabot o’ inabandona sa ilang pamilya.

Gani sila mihangyo nga mausbawan ang maong ayuda gikan sa kasamtangang P300 mil subay sa MOA ngadto sa P1 ka milyon karong 2018.

Matod pa nga padayun ang ilang pagsagop sa mga MCP. Dugang pa, adunay temporaryong shelter nga nahimutang sa JR Borja General Hospital nga giingong puno na usab maong adunay sugyot pagtukod sa bag-ong mental facility.‘

Niini, si Daba mibutyag nga kun mausbawan ang budget unta mapalambo usab ang kapasidad sa fasilidad.

Hinuon, gibutyag nga ang House of Hope regional ang scope ug gipunduhan gihapon sa Archdiocese of Cagayan de Oro ug uban pang mga benefactors.

Alayon niini, si Daba uban ni konsehal George Goking mirekomendar nga usbawan ngadto sa P1.5 milyon ang assistace sa House of Hope ug laing P1.5 milyon ngadto sa RCE aron matubag ang mga panginahanglanon. (Yonggals w/ reports from MJLdP/JCT)