SB1 sa Kauswagan, giuyonan sa konseho

WALAY hunong ang pagsuporta sa Konseho sa syudad ubos ni Bise Mayor Bebot Rodriguez sa mga programa ug proyekto sa Barangay Kauswagan, ning dakbayan.

Kini human ang konseho sa sesyon niadtong Lunes hinusang misagop  sa resolusyon nga nag-uli sa Barangay Ordinance No. 2-2025 nga may kalabotan sa ilang Supplemental Budget No.1 nga mokabat sa P2,184,799.

Tipik sa gihatagan sa prioridad  sa barangay sa maong budget galastohon sa elektrisad, pagtul-id ug pagmintinar sa mga edipisyo ug straktura sa barangay ug uban pang programa  alang sa ilang katawhan.

Ang maong lakang miagi sa  makuting deliberasyon ug pagtuki sa mga hintungdang komite ug mga  buhatan sa City Hall ug nasuta nga nahiuyon kini sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)