Abaday gidayeg daling responde sa nasinateng linog

GIDAYEG ni Konsehal Roger Abaday, chairman sa komite sa public order and safety, ang daling pag-responde sa kagamhanang local atol sa nasinating Intensity IV nga linog dinhi sa syudad sa milabayng mga adlaw.

Kini human gilayong gimando ni City Mayor Rolando Klarex Uy ang pag-suspende sa tanang klase sa pribado og publikong tunghaan ug  pagsusi pinaagi sa buhatan sa City Engineering Office ug Office of the Building Official (OBO) sa tanang gambalay aron masiguro nga luwas ang katawhan human nakasinati sa maong kalamidad.

Kini ang gipaambit nga pamahayag ni Abaday agig reaksyon sa special report ni Konsehal Marlou Tabac atol sa sesyon niadtong Lunes nga gidumala ni Bise Mayor Bebot Rodriguez mahitungod sa gihimong structural inspection sa mga hintungdan ahensiya sa goberno.

Sumala ni Abaday nga kinahanglan mahan-ay nang daan ang mga plano ug aksyon panahon kon adunay kalamidad sama sa baha, linog ug uban pa alang sa kapasigurohan sa katawhan sa dakbayan.

Niini nagpasalamat si Abaday sa buhatan sa City Disaster Risk Reduction Management Department, OBO, ug City Engineering sa hiniusang aksyon ug rekomendasyon atol sa maong hitabo. (MLR/SP)