Goking misugyot mapahigayon sa CdeO PCL Minda Congress

Dako ang panghinaut ni konsehal George Goking nga mapahigayon dinhi sa dakbayan sa Cagayan de Oro ang panagtigom sa mga konsehal sa tibouk pulo sa Mindanao.

Kini human si konsehal Ian Mark Nacaya, sa sesyon sa konseho niadtong Lunes nga gidumala ni bise mayor Kikang Uy, mipadayag sa gilaraw ni Goking nga pagpasiugda sa Mindanao Congress sa Philippine Councilors League (PCL).

Ang maong kalihokan gitakdang himuon sa umaabot Hunyo 28-30, ning tuig.

Sa pakighinabi kang konsehal Goking, iyang gibutyag nga mag-tigom sa umaabot Biernes ang mga presidente sa lain laing chapter sa PCL sa tibouk Mindanao dinhi sa dakbayan.

Kini aron mahikay ang mga gikinahanglan dinha sa pagpahigayon sa maong dakong panagtigom.

Hinuon, mipadayag sa ilang suporta nga moabag sa pagpahigayon sa kalihokan dinhi sa syudad ang PCL Misamis Oriental, Bukidnon ug Iligan City Chapters.