Mga proyekto, programa sa 5 brgys giuyonan


Dugang lima ka mga barangay ang gipaabot nga mopatuman sa ilang mga programa ug proyekto karong tuiga.


Kini human ang konseho sa syudad sa sesyon kagahapon nga gidumala ni bise mayor Kikang Uy misagop og lima ka resolusyon nga nag-uli sa ordinansa sa Barangay 7, 39, Indahag, FS Catanico ug Macasandig diin nasukip ang ilang 2018 Annual Budget alang sa hingpit nga implementasyon.


Nasulod sa maong budget ang listahan sa mga programa ug proyekto nga gipunduhan ug gilaraw nga maghatag sa dugang kaugmaran sa ilang tagsa tagsa ka barangay.


Si konsehal Alam Lim, chairman sa komite sa barangay affairs ug usa sa nagpaluyo sa mga resolosyon, mipasabot nga hugot niyang gisuportahan ang maong lakang nga daling mauyunan ang maong mga resolusyon sa tinguha nga mahatagan sa hingpit nga kalamboan ug kaarangan ang kinabuhi sa katawhan.


Ang resolosyon nga gipalabang sa konseho alang sa maong katuyuan gipaluyuhan sa komite sa barangay affairs ni konsehal Lim ug komite sa pamalaod ug reglamento ni konsehal Ian Mark Nacaya. (Yonggals)