Underground wiring system sa telecoms gilaraw


Ang komite sa public utilities ni konsehal Teodulfo Lao Jr inabagan sa Local Telecommunication Companies, magpahigayon sa ilang clean up ug retrieval of cables dinhi sa syudad.


Kini ang nauyunan sa Task Force Cables and Wires atol sa ilang tigom sa miaging adlaw diha sa Philtown Hotel.

Matud ni Lao nga nasabutan nila nga magsugod sila sa operasyon karon bulan sa Pebrero ug sugdan ang pagpanghipos sa mga nagbitay bitay nga kable sa dalan diha sa Velez Street ug isunod dayon ang Corrales ug Osmena Streets.


Dugang ni Lao nga ngil-ad kaayo tan-awon ang mga kable nga mura og spaghetti nga gabitay sa mga poste ug delikado usab sa katawhan.


Naglaum si Lao nga pinaagi sa pag-abag sa mga local telecommunication companies sama sa PLDT, Globe, Smart, Misortel, Parasat, Philcom ug uban pang kompanya mahimong mahuman kini sa dili pa ang bulan sa Agosto atol sa pangilin sa dakbayan.


Niini, giplano ni Lao nga masugdan na dayon ang underground wiring system diin ang telecommunication companies mohimo na pagbutang sa ilang mga cable ug wires ilalom sa yuta.


Hinoon, magkinanglan gayud kini og igong gahin apan dako ang ako panghinaut nga mapatuman ang plano sa dili pa matapos ang kasamtangang tuig, pamahayag ni Lao. (El Kapitan)