Dugang mga programa, proyekto sa brgy Gusa mapatuman na

Hayan mapatuman na sa barangay Gusa ang ilang dugang programa ug proyekto nga wala pa ma-implementar sa miaging tuig 2017.


Kini human ang konseho sa syudad sesyon niadtong Lunes nga gidumala ni bise mayor Kikang Uy mipalabang og resolusyon nga nag-uli sa ordinansa sa barangay Gusa diin nasukip ang Supplemental Budget No. 1 alang sa hingpit nga implementasyon.


Nasulod sa maong budget ang pundo alang sa dugang programa ug proyekto sa barangay nga makahatag og kalamboan sa ilang dapit.


Si konsehal Yan Lam Lim, chairman sa komite sa barangay affairs, mipasabot nga iyang gisuportahan ang pagpalabang sa maong ordinansa tungod kay iyang nakita ang ka-importante niini aron matunol sa barangay ngadto sa katawhan ang tiunay nga serbisyo.


Ang resolusyon nga gisagop sa konseho alang sa maong katuyuan gipaloyuhan sa komite sa barangay affairs ni konsehal Lim ug komite sa pamalaod ug reglamento ni konsehal Ian Mark Nacaya. (Yonggals)