Plano, programa sa 2018 alang sa seguridad prioridad ni Calizo


Prioridad ni konsehal Romeo Calizo, chairman sa komite sa police, fire and public safety, nga mahatagan og pagtagad ning tuig 2018 ang matud pa nagpadayong drag race nga gakahitabo sa syudad diin delikado sa disgrasya ug nakahatag pa og perwisyo sa katawhan.


Kini ang pamahayag ni konsehal Calizo atol sa ilang senimanang programa sa radio nga “Ang Konseho Karon: The Mover of Change and City’s Development”.


Lakip sa iyang tutukan mao ang giingong mga minor de edad nga nagbisyo sa solvent nga segun sa iyang nadawat nga taho mao usab ang kasagarang suspek sa pagpanghold up dinhi sa syudad, pamahayag ni Calizo.

Niini, dako ang kalipay sa konsehal sa pag-aprobar sa 2018 budget tungod kay daghan ang mga programa nga gihan-ay alang sa pagmintinar sa kahusay ug kalinaw sa dakbayan ug ang gahin alang lang sa maong katuyuan maoy gipaabot.


Naglaom siya nga tungod sa maong kalamboan hayan masugdan na usab ang pagtukod sa bag-ong gambalay alang sa Police Station 5 ug ang bag-ong buhatan sa Philippine Maritime Police.


Lakip usab sa paningkamotan ni Calizo ang paghatag og kaugalingon nga building sa mga ginsakpan sa Philippine Drug Enforcement Unit tungod kay sila lang sa tibook Pilipinas ang walay kaugalingong opisina diin makita nato ang ilang pagpaningkamot nga masumpo ang illegal nga druga. (El Kapitan)