Dalan dinha sa Zone 5 Kauswagan gihangyo


Konsiderahon sa komite sa public works ni konsehal Zaldy Ocon ang sulat nga giduso sa mga residente sa Salvador Compound diha sa Zone 5 Kauswagan mahitungod sa ilang problema sa dalan.


Sa ilang sulat ngadto ni Ocon, ang mga residente mipasabot nga gikinahanglan nila ang permanenting dalan nga maagian sa kapin sa 200 ka molopyo sa dapit.


Matod pa nga aduna nay Certificate of Availability of Fund nga gi-isyo alang sa maong katuyuan pinaagi sa ordinansa nga gipalabang sa konseho sa miaging tuig 2017.


Gipasabot nila nga tungod sa maong gihuptan nga dokumento, sila buot mohangyo sa City Engineering Office nga moabli na sa maong gisugyot nga dalan samtang nagpadayon ang pagproseso sa pag-aprobar sa proyekto alang sa emerhensya nga rason tungod kay nakahatag kanila og kahasol ang walay insaktong dalan nga maagian panahon sa emerhensya labina sa panahon nga adunay mahitabong sunog gawas nga nakaapekto usab kini sa panglawas sa mga hamtong sa ilang dapit.


Dugang niini, ilang gisukip ang pag-uyon sa tag-iya sa lote nga nagpadayag nga iyang gikonsiderar ang pagbaligya base sa fair market value.(Yonggals)