20% advance payment discount sa realty tax gilugwayan

Hayan mahatagan sa dugang panahon ang katawhan sa dakbayan nga biktima sa bagyong Vinta nga makapahimulos sa 20 porsyentong diskwento isip prompt payment discount sa ilang pagbayad sa real property tax (RPT).

Mao kini ang pamahayg ni bise mayor Kikang Uy human giaprobahan sa konseho sa sesyon niadtong Lunes ang ordinansa nga naghatag og lugway sa maong diskwento gikan sa Disyembre 31, 2017 ngadto sa Enero 31, 2018.

Hinuon, si konsehal George Goking, chairman sa komite sa ways and means ug nagpaluyo sa gipalabang nga ordinansa, mipasabot nga kadto lang mga molopyo sa syudad kansang mga lote naapektohan sa bagyong Vinta ang makapahimulos sa maong lugway.

Alang sa pag-avail, ang hintungdang magbubuhis gikinahanglan nga mopresentar og certification of calamity victim gikan sa barangay diin nahimutang ang lote ug nga updated ang bayad sa buhis sa tuig 2017.

Ang lakang nga gipalabang sa konseho gipangamahan usab ni konsehal Ian Mark Nacaya, chairman sa komite sa pamalaod.