Online Banking Scam angayan nga maimbestigahan –Ocon

Gisugyot ni konsehal Zaldy Ocon, chairman sa komite sa public works, nga mohimo og imbestigasyon ang komite sa trade and commerce ni konsehal George Goking kabahin sa giingong online banking scam.

Kini ang reaksyon ni kagawad Ocon sa special report ni konsehal Lordan Suan atol sa sesyon sa konseho niadtong Lunes nga gidumala ni bise mayor Kikang Uy.

Matod sa konsehal nga angayan nga hatagan sa igong pagtagad kini nga isyu tungod kay lakip nga makalulooy ug posibleng dali mabiktima ang mga yanong lungsoranon.

Lakip sa gisugyot ni Ocon ang pagsabwag sa impormasyon ilabina ang tabang sa mga ginsakpan sa prensa aron mapakgang ang pagkuyanap niini nga matang sa pagpangilad.

Nabalaka si Ocon sa posibleng madangatan sa katawhan kun sila mabiktima diin kinayuran og hinagoan nga kwarta unya ang mahanaw lang sa usa ka pamilok.

Mahinumduman nga gituki kini nga isyo ni konsehal Suan sa iyang special report diin nahimong biktima ang iyang suod nga higala.

Nunot niini, nanawagan si konsehal Ocon sa katawhan sa dakbayan nga mahimong maigmaton sa mga transaksyon ninyo sa bangko ug dili mosalig sa mga tawo nga dili ninyo kaila aron malikay sa mga dautang elemento. (El Kapitan)