SK Annual Budget sa Barangay 24 aprobado na

HINGPIT nang maimplementar sa Sangguniang Kabataan sa Barangay 24 ang mga programa alang sa kabatan-onan sa ilang dapit.

Kini human ang konseho sa dakbayan sa sesyon niadtong Lunes nga gidumala ni Bise Mayor Bebot Rodriguez hiniusang misagop og resolusyon nga nag-aprob sa gidusong Annual Budget sa Brgy 24 Sangguniang Kabataan nga mokabat sa P1,404,756.

Gawas sa programa sa paugnat sa kusog, ila usab gihatagan sa prioridad ang programa sa panglawas, edukasyon, kinaiyahan, social inclusion and equity, economic empowerment, peace building and security, governance, active citizenship ug uban pa nga dakog ikatabang sa kaarangan sa kinabuhi sa kabatan-onan.

Ang maong lakang miagi sa makuting pagtu-on ug deliberasyon sa mga hintungdang komite sa konseho.

Ang resolusyon nga gisagop alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Edgar Cabanlas. (JRG/SP)