Solosyon kontra pagbaha prioridad nga tutokan ni Lao

Gisuportahan ni konsehal Teodulfo Lao Jr., chairman sa komite sa public utilities, ang panawagan sa mga sakop sa konseho nga naghangyo og tabang sa nasudnong kagamhanan alang sa usa ka proyekto aron matubag ang mga pagbaha sa syudad panahon kun adunay kalamidad.

Kini ang reaksyon ni Lao atol sa sesyon sa konseho niadtong Lunes nga gidumala ni bise mayor Kikang Uy.

Matud sa konsehal nga gikinahanglan nato ang tabang sa nasudnong kagamhanan kay dili matubag tanan sa lokal nga kagamhanan ang gikinahanglan tungod sa kadako nga galastohon.

Dugang ni Lao nga angayan usab konsiderahon ang paghimo og mga programa sama sa Massive Tree Planting diin dapiton ang mga tinun-an, pribadong sector ug civic organizations aron himoon ang pagpananum dinha sa kilid sa Cagayan de Oro River ingon man sa kabukiran.

Lakip usab niini ang striktong pag-implementar sa detention pond sa tanan mga subdivision dinhi sa syudad sa tinguha nga masolusyonan ang gikinahanglan ilabina panahon sa kalamidad.

Dako ang akong kahingawa diin sa nanlabay nga katuigan gidayo kita sa dakbayan labina sa mga magpapatigayon nga diin gustong mobobo sa lang negosyo tungod luwas sa mga pagbaha ang syudad, pamahayag ni Lao.

Niini, nanghinaot si Lao nga mahatagan kini og prioridad tungod ug alang sa katawhan sa dakbayan. (El Kapitan)